ភ្នំពេញ៖ ទាហានថៃ ឃុំខ្លួនទាហានកម្ពុជា១៨នាក់ អស់រយៈពេញ៧ថ្ងៃមកហើយ។ ដើម្បីសុវត្ថិភាព និងការពារសិទ្ធិទាហានកម្ពុជា គណៈកម្មាធិការសិទ្ធិមនុស្សកម្ពុជា (CHRC) ដាក់ញត្តិបន្ទាន់ទៅអង្គការអន្តរជាតិ ទាមទារឱ្យមានដំណើរទស្សនកិច្ច បែបមនុស្សធម៌ នៅកន្លែងឃុំខ្លួនទាហានកម្ពុជា១៨រូប។
កាលពីថ្ងៃថ្ងៃទី១សីហា CHRC បានដាក់ញត្តិបន្ទាន់ទៅឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស នៅទីក្រុងហ្សឺណែវ និងប្រធានប្តូរវេននៃគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (អាយឆា-AICHR) ដើម្បីស្នើឱ្យជួយអន្តរាគមន៍ ការពារ និងដោះលែងទាហានកម្ពុជា។ CHRC បានផ្ញើលិខិតសុំអន្តរាគមន៍បន្ថែម ទៅតំណាងការិយាល័យឧត្តមស្នង ការអង្គការសហប្រជាជាតិទទួលបន្ទុកសិទ្ធិមនុស្ស ប្រចាំតំបន់អាស៊ីអាគ្នេយ៍, ប្រធានស្ថាប័នសិទ្ធិមនុស្សជាតិឯករាជ្យរបស់ប្រទេសថៃ, តំណាងប្រទេសថៃ ប្រចាំគណៈកម្មការអន្តររដ្ឋាភិបាលអាស៊ាន ទទួលបន្ទុកសិទ្ធិមនុស្ស (អាយឆា) និងប្រធានស្ថាប័នសិទ្ធិមនុស្សជាតិឯករាជ្យរបស់ប្រទេសម៉ាឡេស៊ី។
ក្នុងលិខិតអន្តរាគមន៍ CHRC ស្នើសុំឱ្យ អ្នកតំណាង និងប្រធានស្ថាប័នខាងលើ ធ្វើទស្សនកិច្ចបែបមនុស្សធម៌នៅកន្លែងឃុំខ្លួនទាហានកម្ពុជា ផ្ទៀងផ្ទាត់សុខុមាលភាពផ្លូវកាយ និងផ្លូវចិត្តរបស់ទាហាន រួមទាំងពិនិត្យលក្ខខណ្ឌដែលពួកគេត្រូវបានឃុំខ្លួន។ ជាមួយគ្នាដែរ គឺអំពាវនាវឱ្យជួយសម្របសម្រួលទំនាក់ទំនងរវាងទាហានទាំង១៨នាក់ និងគ្រួសាររបស់ពួកគេ ព្រមទាំងអ្នកពាក់ព័ន្ធផ្សេងទៀត។
CHRC សង្កត់ធ្ងន់បន្ថែមថា៖ «ធានាឱ្យមានការដោះលែងជាបន្ទាន់ និងការព្យាបាលស្របតាមច្បាប់ គោលការណ៍មនុស្សធម៌ បទដ្ឋានអន្តរជាតិ និងគោលការណ៍អាស៊ាន»។ ទាហានកម្ពុជា២នាក់ ក្នុងចំណោម២០នាក់នោះ ដែលត្រូវបានដោះលែង មានស្ថានភាព សុខភាពធ្ងន់ធ្ងរ។
CHRC សង្ឃឹមថា ស្ថាប័នអន្តរជាតិខាងលើ នឹងធ្វើកិច្ចអន្តរាគមន៍សម្របសម្រួល និងចុះពិនិត្យតាមសំណើ
ក្នុងពេលដ៏ឆាប់បំផុត។
ពាក់ព័ន្ធនឹងទាហានកម្ពុជា១៨រូប ដែលថៃឃុំខ្លួននេះ សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ក៏អះអាងថា រាជរដ្ឋាភិបាលកម្ពុជា នៅតែបន្តតាមដានដោយយកចិត្តទុកដាក់បំផុត ចំពោះសុវត្ថិភាព។ កម្ពុជាកំពុងចាត់យន្តការចាំបាច់ផ្សេងៗ ដើម្បីឱ្យមានការដោះលែងយោធាកម្ពុជាឱ្យបានឆាប់បំផុត៕
