ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា បានអះអាងថា រាជរដ្ឋាភិបាលកម្ពុជា នៅតែបន្តតាមដានដោយយកចិត្តទុកដាក់បំផុត ចំពោះសុវត្ថិភាពរបស់យោធាកម្ពុជាចំនួន១៨រូប ដែលកំពុងស្ថិតក្នុងការឃុំខ្លួនរបស់អាជ្ញាធរថៃ។ បើតាមសម្ដេចនាយករដ្ឋមន្រ្តី កម្ពុជាកំពុងចាត់វិធានការតាមយន្តការចាំបាច់ផ្សេងៗ ដើម្បីឱ្យមានការដោះលែងយោធាកម្ពុជាឱ្យបានឆាប់បំផុត និងមានសុវត្ថិភាព។
នារសៀលថ្ងៃទី៤ សីហានេះ សម្ដេច ហ៊ុន ម៉ាណែត បានសរសេរសារបណ្ដាញសង្គមហ្វេសប៊ុកជុំវិញការវិវត្តនៃស្ថានការណ៍ ជាពិសេសករណីទាហានកម្ពុជា ១៩រូប ដែលថៃឃុំខ្លួន។ សម្ដេចនាយករដ្ឋមន្រ្តី លើកឡើងថា ក្រសួងការពារជាតិ អគ្គមេបញ្ជាការ មេបញ្ជាការយោធភូមិភាគរបស់កម្ពុជា បានធ្វើការជាប់ជាប្រចាំជាមួយភាគីថៃ និងបានស្នើម៉ាឡេស៊ី ក្នុងនាមជាប្រធានអាស៊ាន ធ្វើការជាមួយអាជ្ញាធរថៃលើកិច្ចការនេះផងដែរ។
បើតាមសម្ដេច ហ៊ុន ម៉ាណែត រដ្ឋាភិបាល ក៏បានប្រគល់ភារកិច្ចឱ្យក្រសួងការបរទេស តាមរយៈស្ថានបេសកកម្មអចិន្ត្រៃយ៍កម្ពុជា ប្រចាំអង្គការសហប្រជាជាតិ និងអង្គការអន្តរជាតិ នៅទីក្រុងហ្សឺណែវ ធ្វើការជាមួយគណៈកម្មាធិការអន្តរជាតិកាកបាទក្រហម ដើម្បីខិតខំជំរុញការដោះលែងឱ្យបានឆាប់បំផុត។
លើសពីនេះ រដ្ឋាភិបាលក៏បានប្រគល់ភារកិច្ចជូនគណៈកម្មាធិការសិទ្ធិមនុស្សកម្ពុជា សហការជាមួយការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) គណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្ស (AICHR) និងគណៈកម្មការសិទ្ធិមនុស្សជាតិរបស់ប្រទេសថៃ ដើម្បីជំរុញបន្ថែមទៀតឱ្យមានការដោះលែង និងបញ្ជូនយោធាកម្ពុជាទាំង១៨រូប ត្រឡប់មកកម្ពុជាវិញ។
សូមបញ្ជាក់ថា គិតមកដល់ថ្ងៃទី៤ សីហានេះ មានរយៈពេល៧ថ្ងៃហើយ ដែលទាហានកម្ពុជា ១៨រូប ត្រូវបានទាហានថៃខ្លួន កាលពីថ្ងៃទី២៩ កក្កដា បន្ទាប់ពីបទឈប់បាញ់ចូលជាធរមាន។ ដោយឡែក កាលពីថ្ងៃទី១ សីហា ទាហានថៃ បានបញ្ជូនទាហានកម្ពុជាតែ ២រូបប៉ុណ្ណោះ ត្រឡប់មកកម្ពុជាវិញ ក្រោយមានបញ្ហាសុខភាព និងវង្វេងស្មារតី៕
